:::: كيكة التمر ::::

السلام عليكم

شحالكم اخواني الأعضاء؟

اليوم يبتلكم طريقة لعمل كيكة التمر

الطريقة من النت بس جربتها والله روعه وعدلت عليها

وهاي الطريقه

المقادير:

اولا الكيكه:
كوب تمر منزوع النوى ( الطّعام - البذور )
1 ملعقه صغير هيل
2 ملعقة اكل قرفه
3/4 باكيت زبده سايحه ( بحرارة الغرفه )
كوب سكر مطحون >>>> انا احط 1/2 لانه التمر يحليها وماحب السكر وايد
3 بيضات + شوية فستق ( للتزين + ينحط شوي في العجينه )
1 ملعقة اكل فانليا ( بودرة او سايله )
1 و1/2 كوب طحين ( مال الكيك )
1 ملعقه اكل بيكنج باودر
1 ملعقة صغيره بيكربونات الصودا
الطريقة:

يسخن التمر في المايكرويف ثم ييصب عليه ماء مغلي ليكسب صفة الليونه ( يستوي

شكل الكاكاو ) يمكن ياخذ 2 فنجان الى 3 ثم نضيف مقدار الهيل والقرفه ونخليه ع طرف

لين يبرد

بعدين نسير نسوي عجينة الكيكه

نحط السكر والزبده وضربهم في المضرب لين يستون مثل الكريما عقب نضيف البيض

وحده وحده ونحط الفانليا

نخلهم ونروح ننخل الطحين مع البيكنج باودر بيكربونات الصودا

وعقب نضيفها على السكر والزبده والبيض بالتدريج لين مايتجانسون وعقب نحط خليط

التمر بيكون بارد ونخليهم ينخلون اوكي ونضيف عليهم فستق مدقوق خشن

نسير نجهو الصينيه ونفركها بالزبد وعقب نرش شوي طحين عشان مايلزق

نصب الخليط في القالب ونحطه في الفرن نشغل من تحت اول وعقب 5 دقايق نشغل

اللي فوق عشان ماتحترق

ثانية الصوص ( التوفي ) :
فنجان قهوه سكر
علبة قشطه (قيمر ) نستليه
الطريقة

نسخن ماي حار ثم نحط علبة القشطه فيه عشان يسيح ياخذ من 15 الى 20 دقيقه

ثم ناخذ السكر ونحطه في وعاء ونذوبه مثل الكراميل ويوم يغدي لونه ذهبي نضيف

علبة القشطه السايحه ونحركه بمضرب يدوي بيستوي عندنا التوفي

نسوي عقب ماتبرد الكيكه ونجلبه في صحن التقديم

ومن يخلص نصبه ع وجه الكيكه ونزينها بالفستق

_________________